Kisa lanmou t ap ye san yon bon dòz chaplèt?
Mwen te gen 19 lane ,mwen te gen yon menaj ki te pran abitid leve men sou mwen. Li te konn fe sa paske li jalou, paske li paka kontwole emosyon li epi tou, paske l renmen m.
M sonje m premye fwa m rakonte yon zanmi sa ki ap pase nan lavi koup mwen, li di m e m ap repete «Yon gason ki pa janm leve men sou ou pa renmen w vre»
Lanmou!
Se menm koze sa yo nou repete timoun lè n ap kale yo. Nou bat yo lè yo pa fè bèl nòt lekòl, lè yo pa vle koute, nou bat yo lè yo fè maleleve ak lè yo kraze yon bagay nan kay la. Nou bat yo pou byen yo.
Lè w grandi nan yon fanmi kretyen menm jan ak mwen, ou souvan tande Pwovèb 3:12 oswa ebre 12:6, tout rezime a sa: Letènèl chatye pitit ke li renmen. M bat ou pou byen w. E yo kore sa ak pwovèb 22: 6 ki di w leve timoun nan selon chimen ki trase pou li,konsa lè li gran li pa pa p detounen. Pou baton m te konn pran pou koze relijyon, m di eben-ezer bouda m se zèb li pouse ankò. M detounen kan menm.
(Chatiment: nom masculin(de chatier) Peine, sévère en général qui frappe un coupable, punit une faute). Pandan plizye syèk, lajistis penal te konn itilize chatiman sou plizyè fòm tankou, boule moun nan vivan, dekapite ak tout lot vye aksyon ke nou pa anvi diskite.
Jounen jodi a, chatiman sa yo tounen, kout sandal, jouman, degradasyon, kout pwen, kalòt, sentiwon, fwèt,matinèt, igwaz ak tout lòt objè ki anba men granmoun ki ta dwe pwoteje w. Nou fè tout sa yo nan non lanmou.
Baton pa touye Ayisyen oswa w son ma l pou mouri?
Ayisyen gen yon jan li di w «oh manman m te konn bat mwen, èske m mouri?» M konn tande yo ki fyè pou yo di « Se baton ki fè m pa soti tankou ti vagabon» Pou anpil Ayisyen, reyisi nan lavi vle di yon bon travay ak pa al nan prizon. Pandan anpil nan nou ap pase yon twoma kolonyalis de yon jenerasyon a yon lòt.
Ann pran yon poz.
N ap fini tèks la ak kèk kesyon.
Kimoun ki te konn bat gran gran paran w, Zansèt ou yo?
M rekomande w koute epizòd 1 pòdkas manje sale a. (Manman Ayisyen ki rayi pitit fi yo a). Wi vyolans se yon sekèl kolonyalis. Yo aprann ou rayi tèt ou epi rayi pwòp pitit ou. Se yon blan ki te konn bat zansèt ou. Se yon blan ki te konn aprann nou pa gade moun nan je. Nan non kisa? nan non Efezyen 6-8, Nan non Kolosyen 3:22, nan non Timote ak tout lot vèsè nan bib la ke blan yo te konn itilize pou jisitfye esklavajis.
Yon ti istwa tou piti, ou konnen koze rabese pitit ou devan moun jan anpil paran renmen fè a se te yon taktik anpil esklav nan plizyè koloni te konn itilize pou pwoteje pitit yo kont kolon an? Konsa li pa p jwenn enterè nan timoun ou pou l fòse fè travay. Al koute epizod 1 manje sale a si w pako fè sa
Kesyon toujou.
Kisa baton te janm chanje nan sosyete kote nou valorize l yo?
Poukisa yon timoun blan paret yon kote li gentan vle domine, alòske nou menm, menm pou nou briye nou oblije ap mande padon. Nou konnen byen ke nou gen ekselans k ap koule nan venn nou.
Poukisa nou toujou vle timoun pa nou saj, tandiske tout moun pèmèt pa yo pou yo eksprime yo?
E si baton te chanje vre, poukisa nou gen tout politisyen ak vòlè sa yo?
Ou panse granmoun Jovenel Moise pa t konn kale l?
Wi lòt kote te gen Donald Trump tou, men sèl nou menm ki toujou bezwen yon lòt pou ki ap rele sou nou di nou ki jan pou nou mache. Se sèl nou ki kontinye repete koze “ Ayisyen pa mache san baton” sa. Menm entegrite nou pa mache san vyolans.
ki diferans ki genyen ant granmoun ak timoun?
Granmoun nan ka reflechi plis. kidonk se li ki ta dwe pran kou pou erè li.
Poukisa si yon granmoun bat ou se ilegal men timoun nan dwe aksepte sa?
Nou pa panse timoun gen emosyon tou?
Si w pa p kontan pou mari pitit ou bat li, poukisa ou menm ou fè l abitye ak sa? Poukisa w di l se paske w renmen l ki fè w bat li?
Paske l se pwopriyete w? Paske li sanble w?
Eske lanmou mache ak vyolans vre?
FCk no
Epitou, avan w leve zig ou sou yon timoun poze tet ou yon grenn kesyon.
Eske timoun sa gen kapasite pou l konprann?
Si wi?
Pale ak li.
Sinon?
Pou kisa w bat li?
Mèsi anpil pou atik la Lea!❤️❤️❤️
Mèsi pou kontribisyon w!
sa rive jis andann fon kè epi li fèm ap reflechi, kisa ki lakòz tout pwoblèm Ayiti jounen jodia. Mèsi pou aktik sa. Lakay kote yon moun leve se li ki pou ta aprann renmen moun ye epi mete konfyans nan tèt ou, se li ki aprann ou pa anyen pou chak fwa yon lòt moun agrese pandan lap di w mwen renmen w pou ou se yon bagay nòmal paske wap viv avèk yon twomatis depi lèw te fèt. Ou leve avèk yon pè andann w nou pè sak gen pou rive chak fwa nou ta yon desizyon paske nou pè konsekans yo. Se yon bagay ki klè paske nan pi wo nivo nan leta a si peyi enperyalis yo pa pase gouvèman yon lòd li pa janm aji pou entère nasyon an. Ayiti nou tout ap reve a li depann de sa nou aprann timon yo lakay yo kòm valè. Men anndan legliz lè pastè a ap selebre yon maryaj li fè de moun yo konprann gen youn ki siperyè pase lòt paske li di gason se chef fwaye menm janm jezi se chef legliz, se yon movèz entèpretasyon de yon seri pawòl ki fè nou nan nivo povrete sa a. Menm ke mwen ta pran yon lane ap ekri mwen tap finn di tout sak nan kè m paske aktik la leve plim sou do m, paske mwen toujou nou menm ayisyen nou toujou rete nan esklavaj menm nou pa gen nan pye nou , si nou pa mete nou nan dimansyon pou franchi baryè sak devan nou an , jenerasyon an jenerasyon nap vinn pi pòv paske nou pa gen okenn konesans sou pratik nou yo ki enpak li fè sou nou nan anviwòman, mèsi fanmi!
Sispann leve zig sou timoun yo.
Sekèl yo anpil, twoma yo tou.
Si zig ou grate w, boure l anba on recho dife☺️
Mèsi Leya!
Mèsi paske w pale pou sila ki paka yo
M renmen tande pòdkas ou yo e se toujou yon plezi pou m li w ❤❤❤❤
Mwen li atik la ak anpil enterè. Mwen malerezman fè pati de paran ki konn bat timoun menm si depi yon ti tan mwen deside pa fè sa ankò paske m.te vin dekouvri pwòp twoma m yo dèyè tandans sa a. Mèsi anpil Leya pou pawòl sa yo kap sansibilize anpil moun ki deside chanje.
Mèsi anpil, m ap sonje m konn kale ti frèm yo, m ap goumen ak tèt mwen seryezman pou sa pa repete ankò.
Yes baton pa chanje moun, okontrè li ka eksite moun nan pou l fè sa w pa vle l fè a menm.
Waww gro bagay ui u rankonte la ,paske lem t adolescente mt komanse rebelem sou bgy sa yo ,yo t di c movez espri ki nan tet mw.
Merci pou bèl tèks sa Leya!
Anpil moun kokobe nan lespri yo nan admèt moun enstrimantalize yo menm pandan yo granmoun akoz fason paran yo te leve yo…
Gen bagay mpap di anba post la…
La cause est noble