Mwen pa bay moun veye fouk mwen epi lang mwen sal. M renmen sèks, m renmen pale de sèks.

Men kijan m konprann lavi. Mwen egziste jiskaske m mouri. M ap toujou gen tan jiskaske m pa gen tan ankò. Mwen pa sonje kilè m te chwazi egzite, ofèt, m pa menm konn si m te fe chwa egziste. Sèl sa m konnen, toutotan mwen egziste m ap itilize tan m nan sa ki fè m plezi, jiskase m mouri. 

M ta renmen panse m gen anpleman kontwòl sou endividi ke mwen devni an. On endividi ki gen kapasite pou l konprann moun à trave bonè yo menm jan ak doulè yo. On endividi ki toujou otantik kèlkeswa sikonstans lan, kèlkeswa konsekans lan. Malgre sa, plis m ap dekouvri tèt mwen, plis m ap konprann kijan anvirwonman m kontribye a fason mwen panse e fason mwen wè mond lan. Pa egzanp, si depi m timoun mwen pat konn vyolans ak la mizè, petèt mwen te ka pa gen pyès anpati jounen jodi a. Petèt m pa t ap renmen libète si mond lan pa t toujou ap eseye anchennen m. M pa konnen sa mwen pa konnen. 

Sèl sa m konnen, se ke mwen anvi prete vwa m a timoun ki pa genyen ditou yo. M vle fè yon chanjman nan lavi anpil timoun ke lavi a refize kite rete timoun jis paske yo te fèt nan move kondisyon. mwen vle fè sa a travè oganizasyon ke mwen bati ki rele Rose of Hope Haiti. M konnen m vle rete lib e libè. 

M te yon timoun dezòd. M te konn toujou ap kouri, jwe foutbòl ak tigason, monte pye bwa oswa yon tèt mi, teke mab, toujou ap fe eksperyans ki te vreman danjere pou timoun espesyalman pou yon tifi k ap grandi an Ayiti. Erezman, manman m pa t eseye kontwole m. Depi m te tou piti li te fè m santi se nòmal pou mwen moun ke mwen vle ye a. Li te pèmèt mwen fè pwòp eksperyans pa m. A lepòk, yo pa t konn wè paran ki libere pitit yo byen. M te konn anpil timoun nan antouraj mwen ki te vle libete sa. M te konnen lòt tou ke paran yo te konn pini yo jis paske yo te vle menm bagay avèm. Gen timoun ki te oblije ap pran swen tout yon kay pandan yo ta sipoze ap jwe oubyen al lekòl. Gen lòt timoun tou ki fe tout vi yo ap sibi vyolans seksyèl, ke tout katye a te konnen. Epi kou yo gwòs, yo mete yo deyo nan kay la san jistis, san anyen. Te gen timoun bò kote m ki pa t ka manje, sa ki pa t ka gen rad menm jan ak mwen, ki pa t gen privilèj monte yon machin vwa ale lekol. Lasosyete te vle fèm konprann ke timoun sa yo pa t merite anyen, ke timoun sa yo pa t vo lapèn paske paran yo te nan move ran sosyal. Sosyete a te vle fèm konprann ke mwen siperyè de timoun sa yo paske paran m te ka banm banm plis byen materyèl. Sosyte a te aprann mwen ke timoun sa yo pa t merite anyen ditou. 

M te konnen sa m te vle fè ak lavi m depi m te gen 5 ou 6 an. M te vle fè yon espas nan mond lan pou tout timoun sa yo ki rejte yo jwenn plas yo sosyete a. M jis pa t konn ki jan pou m te rive kote ke mwen te vle rive a. M te toujou anvi redwi kantite timoun ki pral santi yo enferyè parapò a lòt timoun . M vle diminye kantite timoun k ap viv vyolans fizik ak vyolans seksyèl.  M vle ke plis timoun gen aksè a dlo, manje, edikasyon ak rad. 

Sof ke m pa t janm konprann anvi ede a mache kòt a kòt ak pwòp libetem. M pè restriksyon ke sosyete a vle enpoze m. Lè nou panse ak fanm k ap ede timoun, nou souvan panse a yon fanm ki aji tankou modèl pou sosyete a. Anpil fwa nou panse ak yon manman, yon fanm marye, yon fanm ki pa gen vi seksyèl, yon fanm ki veye langaj li lè l ap pale. M pa youn nan bagay sa yo. M se yon fanm ki viv nan libete l, ki pa gen timoun ki pa gen plan pou gen timoun. Mwen pa bay moun veye fouk mwen epi lang mwen sal. M renmen sèks, m renmen pale de sèks. M pa baze tout pesonalite m sou sa moun panse de mwen. M renmen abiye de fason oze, m pa rezeve nan fason m ap aji. Mwen di e fè bagay ke mwen pa ta dwe ni di ni fè. M konprann ke se de seri de bagay ke sosyete  a ka itilize kont mwen pou yo rabese travay mwen. Èske sa vle de ke mwen ta dwe sispann mande fon pou m ede timoun yo an Ayiti? Sosyete a menase m ak vye ide de purete yo a.

M te gen de chwa, swa m chwazi libere m de sosyete ak tout presyon l oswa kontribye a sosyete a. M te fini pa chwazi tou de. M obilje travay plis pou m ede tet mwen ak timoun mwen yo an Ayiti. 

Se rezon sa ki fè mwen vle lanse D’akaz cosmestics. Se yon pwojè ke mwen kreye pou m ka kontinye pran swen tèt mwen pandan m ap sipote mond lan. Sèl moun mwen konnen mwen dwe yon bagay se timoun ke m ap ede yo. Menm la, m pa bay moun dwa dikte jan mwen chwazi viv vi pesonèl mwen. M ap travay sou lansman an toujou kidonk m ap mande nou pou nou swiv nou sou rezo yo konsa n ap konnen lè dat la pare.

Cassandre Souvenance.

Instagram:Piccasseau 

Rose of Hope Haiti se sant tou sa m ap fè. Nenpot jan ou santi ou ka sipote t ap byen ede nou. Nou bezwen plis moun ki kwè ki vle sipote travay ke n ap fe a, nou bezwen moun k ap toujou disponib pou ede tout timoun menm apre m pa gen tan nan mond sa ankò.